Språk/Languages
Norsk Julevsáme English Русский

Normalveien

Gássjelisvuodadásse: 4+
Gibttsomguhkkudahka: 1 doahkeguhkkudahka ja gibttsom doagev miehtáj
Vuostasj jåvsådibme: Carl Wilhelm Rubenson, Alf Bonnevie Bryn ja Ferdinand Schjelderup, jagen 1910
Vuostasj dálvvejåvsådibme: Ralph Høibakk, Arne Næss ja Kjell Friis Baastad, jagen 1963

Sajedum oarjjelulle tjavelk Státtátjåhkå vuosstij le dav majt vuostatjin vuojná gå boadá Halls fortoppaj. Vargga bæstá ájmov gå vuojná! Návti lij dávk Carl Hall vásedam gå bådij åvddåtjåhkkåj jagen 1889 váni guhkebuv boahtemis. Maŋŋela hæhttuj brihtalasj gibttsompionerra William C. Slingsby aj moaddot dan rádes tjavelga nalta. Ij åvddål C.W. Rubenson vuorbástuváj tjuvddegiehtjetraversajn Mysostena vásuk, de maŋemus hieredibme gádoj.

Normalveien @ Ienemus oasse sijájs gudi dáppe gibttsu ásadi crux-traversa goaran ja gibttsu doagev miehtáj ietjá sajijn tjavelgin. Ienemus oassáj le sáhka nuppát ja goalmát dáse gibttsomis, valla viehka allagisán. Tjáŋa dárbbagijt Halls fortoppan ja luojttáda tjavelga gårobielev. Tjuovo lanjáv gierge birra. Máhtá válljit gássjelap gibttsomav jus gibtso 2-3 mehtera vuollelav, jali máhtá tjuovvot álkep, valla várálappo vuolep traverserigav váj besa ruopptot gåbdå tjavelga nali. Dát gal ruvva gædtsu nijbbeájmmon slædoj goabbák bielen. Tjåhkkida tjavelga nali ja oagoda tjuovvovasj mehterijt desik boadá ådå, gåbdep oassáj tjavelgis. Gibtso lanjáv vuolus stuorra duolbbis gærggáj. Ållu oalgesbielen manná vehi rádes væddja vuolus gåbdå sáladissaj. Ietján gå tjuvddegiehtjetraverssa le dát gássjelamos sadje ålles tjavelgin. Soajttá gássjel gávnnat almma sihkarasstemsajev dán vuollájtjágŋamij, valla muhtema gállojs dån stuorra duolbba gierge nanna li viehkken. Dálla le dal lanjáj nanna ma doalvvu gitta tjuvddegiehtjetraverssaj. Ásada muhtem vertikála sáladisájda åvddål boadá várálamos oassáj traversas. Váttse lanjá loahppaj ja gávna tjielgga horisontála girjjájt, ma li fijna anedimsaje tjuvdijda. Dálla gahtsaja giedaj milta, tjuvde girjjá nanna ja váni anedimsajes juolgijda. Duv vuolen dal oarjjelullebiele guojttelis ja njalges slædo ájtti. Dát le dat giehtos tjuvddegiehtjetraverssa Mysostena birra. Traverssa ij la ienep gå muhtem mehtera guhkke, valla da li åvtåtrajes. Gå då bælláj boadá de girjjásystebma manná gitta vuogas sihkarasstemsadjáj stuorra gállon. Dáppet le ienemus oassáj álkke gibttsot, muhtem rádes ja vehi várálasj sajij gåbdå tjavelgin tjåhkå vuosstij. Bielnup tijmma gal vihpá tuvran Halls fortoppas gitta tjåhkkåj, bajás ja sæmmi vuolus.

Bajás Halls fortoppaj

Tjuovo bálggáv dat stuorra parkerimsaljos Stáddá vuolen. Årdå badjela tjuovo bálggáv ja nållåjt gálloj gaskav gitta Tjáhppisjávrráj (724 mehtera badjel mera). Jávres tjuovo gállojt unna alladagá vuosstij. Dánna vuojná gåggu vijdábut goarri várev bajás. Bálges tjuovvu váhkov várev bajás diagonála milta. Sáddujs ja smáv gærgátjijs le galle bálggá miehtáj, ja duolloj-dálloj le sáddu ruoppsadin. Joarke gálloj badjel ja váhko vuosstij. Tjuovo váhkkov várev bajás. Gáhttiju då luovas giergijs ja sáddus bálggá nanna. Tjuovo váhkov gitta kote 1100 rádjáj. Muhttijn hæhttu giedaj viehkedit. Kote 1100 rájes jårgijt bálges tjavelga vuosstij, muhttijn hæhttu gibttsot vehi, valla ij la gal várálasj jus ravga. Gå la kote 1160:in de le tjavelga nanna, ij la desti sæmmi rádes, ja maŋemus 150 alladakmehtera váttsá bajás nållåj tjåhkå nanna.

Luojttádibme

Gå galga vuolus vas Státtátjåhkås Halls fortoppaj de váttsá jur sæmmi láhkáj, avtajn ájnas ærádusájn: ienni gå tjuvddegiehtjetraversa milta de guotsada sjielvvi Mysostena nali gånnå boalltidum rapelltjanástagáv gávna. Luojttáda sulle 15 mehtera ladnjaj gåsstå traverssa álgij bajás váttsedijn. Dassta vuolus tjuovo sæmmi bálggáv Halls fortoppas parkerimsalljuj dagu bajás váttsedijn.

Moaddot

Ålles ruvtov miehtáj le álkke moaddot jus hæhttu.

Dárbulasj dárbbaga

Akta 30-mehterasj doahke, akta iridis-tjoahke, 3-5 oanegis slivŋŋasa ja guokta-gålmmå medium bádneiridisá.

Tysfjord kommune, Boks 104, 8591 Kjøpsvik
postmottak@tysfjordkommune.no
Telefon: 75 77 55 00, Faks: 75 77 55 55
www.tysfjord.kommune.no